Ish-kryetari i Sindikatës Ushtarake të Serbisë, Novica Antiq, është arrestuar më 17 tetor në Kragujevc, sipas urdhrit të Departamentit Special për Luftimin e Krimit Kibernetik pranë Prokurorisë së Lartë Publike në Beograd. Ai dyshohet për veprën penale shkaktim paniku dhe çrregullim.
Nga Prokuroria bëhet e ditur se N.A. më 15 tetor, përmes një postimi në rrjetin social X, ka përhapur pretendime të pavërteta rreth një stërvitjeje të Ushtrisë së Serbisë, duke lënë të kuptohet se po përgatitet një puç.
Sipas Prokurorisë, në postimin e tij Antiq ka shkruar se njësi të Ushtrisë së Serbisë, pak ditë para zgjedhjeve dhe në një periudhë që nuk është paraparë për stërvitje, po ushtrojnë veprime taktike lufte në vendbanime, gjatë natës. Në fund të postimit ai ka shtruar pyetjen nëse kjo "mban erë puçi".
Pas arrestimit, policia, me urdhër të gjyqtarit të Gjykatës së Lartë në Beograd, ka kryer bastisje në shtëpinë familjare të Antiqit në Kragujevc. Bastisjen e ka konfirmuar avokati i tij, Ivan Ninić.
Sipas të dhënave të deritanishme, ndaj Antiqit është caktuar masa e ndalimit deri në 48 orë, pas së cilës pritej të dërgohej për marrje në pyetje në Prokurorinë e Lartë Publike në Beograd.
Vëllai i të arrestuarit, Vaso Antiq, i ka thënë gazetës "Danas" se nuk e di shkakun e saktë të arrestimit.
Është e saktë se e kanë arrestuar Novicën, është duke u kryer bastisja e shtëpisë familjare në Kragujevc, kurse më pas do të çohet në Beograd.
Vaso Antiq ka shtuar se, sipas tij, bëhet fjalë për një tentativë tjetër frikësimi dhe represioni.
Novica Antiq ka qenë më parë në krye të Sindikatës Ushtarake të Serbisë dhe njihet për deklaratat publike rreth gjendjes në ushtri. Hetimet vazhdojnë.
Linku i shkurtër: balkanvijesti.com/v/xSiaXnI6
