Përgatitjet për zgjedhjet e parakohshme parlamentare në Serbi janë në zhvillim të plotë, ndërsa po kristalizohen ekipet që do të garojnë në garën zgjedhore të tetorit. Sipas vlerësimeve, ky raund zgjedhor mund të jetë më dramatiku prej vitit 2012, kur Partia Përparimtare Serbe (SNS) dhe presidenti Aleksandar Vuçiç erdhën në pushtet.
Deri më tani, Komisioni Republikan Zgjedhor (RIK) ka shpallur dhjetë lista, ndërsa lista përfundimtare ende nuk është e njohur, pasi jo të gjithë kanë dorëzuar kërkesat për kandidaturë.
Ndër listat e shpallura janë ato të partisë në pushtet SNS dhe Partisë Socialiste të Serbisë (SPS), Lista Studentore "Studentët Fitojnë", "E Djathta Autentike" e Millosh Jovanoviqit, si dhe listat "Zgjedhja e Popullit" dhe "Serbia Evropiane". Katër lista të tjera përfaqësojnë komunitetet pakicë: Bashkësia e Hungarezëve të Vojvodinës (SVM), lista e Rasim Lajiqit, lëvizja e Usame Zukorliçit dhe Partia Ruse.
Sipas njoftimeve, koalicioni "Serbia Popullore", i përbërë nga Lëvizja Popullore e Serbisë, Fytyrat e Reja të Serbisë dhe Kryengritja Ekologjike, ka njoftuar se do të tërheqë listën "Zgjedhja e Popullit" për shkak të mbështetjes ndaj studentëve.
Lista e SNS-së, e quajtur "Aleksandar Vuçiç - Serbia e Bashkuar", do të jetë e para në fletën e votimit. Në krye të saj është Vuçiç, kandidat për kryeministër, i pasuar nga ish-kryeministri Millosh Vuçeviq dhe kryetarja e Kuvendit, Ana Brnabiq. Në listën e 250 kandidatëve figurojnë edhe zyrtarë të Partisë Radikale Serbe, ndër ta Vjerica Radeta dhe djali i Voisllav Sheshelit. Vuçiç ka njoftuar në një mbledhje të Kryesisë së SNS-së në Nish se qeveria e ardhshme do të ketë vetëm 12 ministri, në vend të 30-ës aktuale.
Koalicioni rreth socialistëve, i quajtur "Ivica Daçiç - Faktor Stabiliteti", udhëhiqet nga ministri aktual i Brendshëm, Ivica Daçiç. SPS del në zgjedhje në bashkëpunim me Serbinë e Unifikuar dhe Partinë Socialdemokratike, ndërsa brenda partisë ka pasur ndarje pas largimit të zyrtarit Branko Rruziq.
Lista studentore, shkak kryesor i zgjedhjeve
Protestat masive, të nisura pas rrëzimit të një strehe në stacionin hekurudhor të Novi Sadit, ku humbën jetën 16 persona, çuan në kërkesën e studentëve për zgjedhje të parakohshme parlamentare. Lista e tyre u dorëzua më 14 shtator dhe u shpall të nesërmen nga RIK.
Në krye të listës studentore, me 250 kandidatë, është kardiologu Ilija Sërdanoviq nga Instituti i Sëmundjeve Kardiovaskulare të Vojvodinës. Ndër kandidatët tjerë përmenden ish-kapiteni i basketbollit Dejan Bodiroga, ish-guvernatori i Bankës Kombëtare Dejan Shoshkiq dhe sociologu Jovo Bakiq.
Sipas hulumtimeve të opinionit publik, lista studentore konsiderohet rivalja kryesore e pushtetit, gjë që ka sjellë mbështetjen e disa partive opozitare, ndër to Partia Demokratike, Fronti i Gjelbër-Majtas dhe Dveri. Ndërkohë, Lëvizja e Qytetarëve të Lirë ka njoftuar se do të dalë në zgjedhje vetëm nëse formohet një koalicion i unifikuar proevropian i opozitës.
Linku i shkurtër: balkanvijesti.com/v/HrkbKPmu
