Tensionet mes Sarajevës dhe Beogradit për zgjedhjet e ardhshme parlamentare në Serbi janë thelluar pasi ministri i Jashtëm i Bosnjë-Hercegovinës, Elmedin Konakoviq, njoftoi se nëse Serbia organizon votim në territorin e BeH-së pa pëlqimin e institucioneve vendase, stafi i Ambasadës së Serbisë që merr pjesë në këtë proces do të kthehet në shtëpi.
"Po hyjmë në një precedent shumë të rrezikshëm. Nëse Serbia vendos që pa leje të Këshillit të Ministrave apo të Ministrisë së Jashtme të organizojë zgjedhje, kam njoftuar autoritetet serbe se njerëzit e ambasadës, sipas kompetencave që kam, do t'i dërgojmë në shtëpi, të gjithë ata që do ta bëjnë këtë para zgjedhjeve", ka deklaruar Konakoviq për agjencinë Fena.
Sipas ministrit, propozimi për dhënien e pëlqimit që shtetasit serbë në BeH të votojnë në zgjedhjet e caktuara për 25 tetor nuk do të marrë mbështetjen e ministrave boshnjakë në mbledhjen e jashtëzakonshme të Këshillit të Ministrave të BeH-së, të paraparë për 20 tetor.
Konakoviq tha se mbledhja është thirrur në mënyrë jo të zakonshme, pasi ministri i Tregtisë së Jashtme, Stasha Koshariq nga SNSD, i ka kërkuar kryesueses së Këshillit të Ministrave, Borjana Kristo, që në rend dite të vendoset një material nga kompetenca e Ministrisë së Jashtme, megjithëse sipas procedurës së rregullt këtë propozim duhet ta bëjë vetë ministria përkatëse.
Sipas tij, ministria e tij e ka përgatitur materialin e nevojshëm, por u ka kërkuar ministrave të SNSD-së që më parë të zhbllokojnë rreth dhjetë pika nga kompetenca e Ministrisë së Jashtme, të cilat, siç thotë ai, kanë mbetur të bllokuara për muaj me radhë pa ndonjë arsye. Mes tyre janë vendimet për blerjen e objekteve për rrjetin diplomatiko-konsullor, për të cilat janë siguruar tashmë mjete buxhetore, si dhe emërimet e atasheve në disa shtete evropiane.
"Këto i bllokojnë nga njëfarë inati", vlerësoi Konakoviq, duke shtuar se kishte propozuar që të dyja çështjet të zgjidhen njëkohësisht, pra të zhbllokohen pikat e kontestuara dhe njëkohësisht të lejohet votimi i shtetasve serbë në BeH. Sipas tij, përfaqësuesit e SNSD-së nuk e kanë pranuar këtë kompromis.
"Kemi propozuar t'i zhbllokojmë të gjitha, të lejohet edhe votimi. Megjithatë, ata vendosën të ndjekin një rrugë tjetër. Nesër kjo pikë nuk do të ketë mbështetjen e ministrave boshnjakë dhe nuk mund të kalojë", përfundoi ministri.
Ambasada e Serbisë në fund të shtatorit i ka dërguar Ministrisë së Jashtme të BeH-së një notë diplomatike në lidhje me zgjedhjet parlamentare në Serbi, bashkë me kërkesën për hapjen e vendvotimeve në territorin e BeH-së. Koshariq më parë e ka akuzuar Konakoviqin se po pengon ushtrimin e të drejtës së votës së shtetasve serbë, duke këmbëngulur që Këshilli i Ministrave të marrë vendim për këtë çështje.
Sipas të dhënave të mediave lokale, aktualisht në BeH jetojnë rreth 20.000 shtetas serbë me të drejtë vote. Si do të përfundojë mosmarrëveshja, do të dihet pas mbledhjes së Këshillit të Ministrave të BeH-së, të paraparë për 20 tetor.
Linku i shkurtër: balkanvijesti.com/v/oSgx0srT
