Instituti për Transfuzion të Gjakut i Serbisë ka njoftuar se rezervat e gjakut janë të zvogëluara prej tre muajsh dhe aktualisht mjaftojnë vetëm për një ditë e gjysmë. Për këtë ka folur sot për RTS, Mirjana Kneziqeviq nga ky institut.
Sipas saj, mungesa më e madhe është te grupi i gjakut "A" dhe grupi 0, veçanërisht te 0 pozitiv. Siç bëhet e ditur, rritja e fundit e infeksioneve respiratore ka ndikuar edhe në uljen e numrit të dhuruesve vullnetarë që vijnë në institut.
Kneziqeviq ka paralajmëruar se nëse rezervat nuk rriten urgjentisht, ekziston mundësia e shtyrjes së disa operacioneve në institucionet shëndetësore.
"Rezervat e gjakut aktualisht mjaftojnë për një ditë e gjysmë. Mungesa më e madhe është te grupi 0, veçanërisht 0 pozitiv. Ftohen të gjithë qytetarët e shëndetshëm dhe madhorë që të dhurojnë gjak", ka thënë Kneziqeviq.
Sipas të dhënave, instituti duhet të mbledhë çdo ditë rreth 300 njësi gjaku, përkatësisht 1.500 njësi në javë, në mënyrë që të plotësohen nevojat e sistemit shëndetësor. Kneziqeviq thotë se nivelet e ulëta të rezervave janë të pazakonta për këtë periudhë të vitit, pasi gjendja e verës është shtrirë deri në fund të tetorit.
"Është e rëndësishme që të gjithë ta kuptojnë seriozisht këtë thirrje, sepse sistemi shëndetësor nuk mund të funksionojë pa sasi të mjaftueshme gjaku", ka theksuar Kneziqeviq.
Qytetarët mund të dhurojnë gjak në Institutin për Transfuzion të Gjakut të Serbisë, në rrugën "Sveti Sava" nr. 39 në Beograd, ditëve të punës nga ora 7 deri në 19, si dhe të shtunave nga ora 8 deri në 15. Ndërkohë, ekipet e institutit organizojnë edhe aksione në teren për dhurim vullnetar gjaku në pjesë të ndryshme të vendit.
Nga instituti bëjnë apel që qytetarët t'i përgjigjen thirrjes, pavarësisht grupit të gjakut, në mënyrë që të shmanget mungesa që do të mund të rrezikonte funksionimin e rregullt të sistemit shëndetësor.
Linku i shkurtër: balkanvijesti.com/v/dlB7J3N1
