Jennifer Lawrence u fillim u refuzua se ishte "shumë e bukur" për rolin

Aktorja amerikane Jennifer Lawrence, atëherë 19 vjeçe, u refuzua dy herë në vitin 2009 për rolin kryesor në filmin "Winter's Bone", siç bëhet e ditur nga Far Out Magazine. Arsyeja ishte se producentët e konsideronin tepër të bukur për të luajtur një vajzë adoleshente që jeton në varfëri dhe mbijeton mes vështirësive.

Në Hollywood pamja e jashtme shpesh është vendimtare për ndarjen e roleve, meqë filmi mbetet një medium vizual. Edhe aktore të mëdha si Meryl Streep kanë kaluar përvoja të ngjashme. Asaj dikur i qe thënë se nuk ishte mjaft e bukur për rolin në "King Kong", i cili përfundimisht i kaloi Jessica Lange.

Në rastin e Lawrence ndodhi e kundërta. Pavarësisht se kishte luajtur vetëm në pak filma deri atëherë, angazhimi i saj më i gjatë ishte në serialin komik "The Bill Engvall Show", ajo nuk dëshironte ta pranonte refuzimin.

"Nuk ishte thjesht edhe një provë tjetër. Ndieja se duhej ta merrja atë rol. Nuk kisha ndër mend të ndalesha derisa ta fitoja", ka deklaruar aktorja për The Orange County Register. "Ishte roli më i mirë femëror që kisha parë prej kohësh. Ndonjëherë shoh diçka dhe thjesht duhet ta kem."

Audicioni i dytë, pa makiazh

Lawrence tha se e tërhoqi edhe vetë filmi. "Filmi nuk i bën lajka askujt. Filma të tillë i dua", ka shtuar ajo. "Shija ime ndryshon nga shija e njerëzve të tjerë. Filmat që zakonisht fitojnë shumë para në këtë qytet nuk janë ata që unë i dua. Ky film nuk u realizua për të fituar para."

Pasi u refuzua dy herë në Los Angeles, aktorja mori vendim të pazakontë dhe fluturoi drejt New Yorkut, ku vazhdonin audicionet për role të tjera femërore, këtë herë duke u paraqitur pa asnjë makiazh.

"Më refuzuan dy herë në Los Angeles dhe prandaj fluturova drejt New Yorkut. Vetë luftova për një mundësi tjetër. U thashë atyre se po vija dhe se duhej të më pranonin. Thjesht u paraqita ndërkohë që ata ende po bënin audicione për vajza të tjera", ka kujtuar Lawrence.

Përpjekja dha rezultat dhe aktorja fitoi rolin kryesor. Interpretimi i saj në "Winter's Bone" i solli nominimin e parë për çmimin Oscar. Në vitet në vijim erdhën role në "X-Men: First Class" dhe "The Hunger Games", ndërsa për filmin "Silver Linings Playbook" fitoi edhe Oscarin për aktoren më të mirë.