Nish: Katër vjet burg për sulmin me thikë ndaj partnerit të biznesit në një kafene

Gjykata e Lartë në Nish ka dënuar S. R. (36) nga Nishi me katër vjet burg për vrasje në tentativë të partnerit të tij të biznesit I. I. (43), të cilin e sulmoi me thikë më 31 tetor 2024 në një kafene në sheshin Mbreti Milan, në qendër të qytetit, raportojnë mediat serbe.

Sipas vendimit të gjykatës, dy burrat ishin ulur së bashku në lokal. Pasi u kthye nga tualeti, S. R. iu afrua partnerit nga pas, e kapi me një dorë rreth qafës dhe me dorën tjetër e goditi në anën e djathtë të qafës me një thikë me teh 15 centimetra të gjatë, të cilën e kishte marrë nga shtëpia.

Doreza e thikës u nda nga tehu dhe ra në dysheme, çka, siç konstatoi gjykata, parandaloi pasoja më të rënda. I akuzuari më pas mori një gotë nga tavolina dhe e goditi I. I. në kokë.

I lënduari arriti të dalë në rrugë, të ndalojë një automjet dhe të dërgohet në ndihmën e shpejtë, e prej andej në Qendrën Klinike Universitare të Nishit, ku iu konstatuan lëndime të lehta trupore.

Gjatë procesit, i akuzuari u mbrojt me pretendimin se donte vetëm ta frikësonte partnerin, jo ta vriste, duke thënë se ky i fundit e kishte kërcënuar dhe i kishte kërkuar 350.000 dinarë. I dëmtuari e mohoi këtë dhe deklaroi se i kishte dhënë të akuzuarit para për të mbuluar një borxh.

Gjykata konstatoi se S. R. e kreu veprën në gjendje të përgjegjshmërisë së zvogëluar dukshëm, çka u mor parasysh gjatë caktimit të dënimit. Në dënim i është llogaritur koha e kaluar në paraburgim.

Sqarohet se i dyshuari ishte arrestuar ditën e sulmit. Policia e Nishit kishte njoftuar atëherë se ai e kishte goditur viktimën me thikë në qafë dhe me gotë në kokë në një lokal në qendër të qytetit, ndërsa Prokuroria e Lartë Publike në Nish i kishte caktuar fillimisht ndalimin deri në 48 orë, e më pas paraburgimin.

Fakti që tehu u nda nga doreza dhe që viktima pësoi vetëm lëndime të lehta ishte vendimtar për vlerësimin e gjykatës se bëhet fjalë për tentativë, ndërsa mbrojtja pretendoi se nuk kishte qëllim vrasjeje.

Vendimi nuk është i formës së prerë dhe ndaj tij mund të ankohen si mbrojtja, ashtu edhe prokuroria, për çka do të vendosë Gjykata e Apelit në Nish. Sipas Kodit Penal të Serbisë, për vrasjen në tentativë parashikohet dënimi si për veprën e kryer, nga pesë deri në pesëmbëdhjetë vjet, me mundësi zbutjeje, gjë që gjykata e ka zbatuar në këtë rast.