Një pjesëtar i Zhandarmerisë së Serbisë, i cili siguronte ambasadën e Izraelit në Beograd, u sulmua natën e kaluar me dy thika nga një person për të cilin policia dyshon se është i mitur nga Shabci. Zhandarmi e vrau sulmuesin në vetëmbrojtje, njoftoi ministri i Punëve të Brendshme të Serbisë në mandat teknik, Ivica Daçiq.
Sipas Daçiqit, sulmi ndodhi rreth orës 00:15 para ndërtesës së ambasadës në lagjen Dedinje të Beogradit. Siç bëhet e ditur, sulmuesi u hodh mbi zhandarm duke bërtitur "Allahu ekber" dhe duke përdorur dy thika.
Identiteti i sulmuesit ende nuk është konfirmuar zyrtarisht, ndërkohë që policia dyshon se bëhet fjalë për një të mitur nga qyteti i Shabcit.
Zhandarmi mbeti i lënduar lehtë, me një prerje në fytyrë. Sipas mediave serbe, gjendja e tij shëndetësore është e mirë dhe pritet të lirohet sot për trajtim shtëpiak. Atë e vizituan në spital ministri Daçiq dhe drejtori i policisë, Dragan Vasiljeviq.
Daçiq pretendon se sulmuesi ka qenë përkrahës i të ashtuquajturës Shtet Islamik, duke theksuar se në profilin e tij në Instagram kishte publikuar flamurin e zi dhe simbole të kësaj organizate.
Niveli i rrezikut, ngritur në shkallën më të lartë
Pas sulmit, ministri Daçiq ngriti nivelin e rrezikut nga terrorizmi në shkallën e kuqe, atë më të lartën, çka nënkupton prani të shtuar policore pranë objekteve me rëndësi të veçantë sigurie, si dhe në vendet ku mblidhen numër i madh qytetarësh.
Sipas të dhënave, ky nuk është sulmi i parë ndaj policisë para ambasadës izraelite në Beograd. Në qershor të vitit 2024, një burrë e goditi me shigjetë në qafë një pjesëtar të Zhandarmerisë që ruante ambasadën, ndërsa zhandarmi e vrau sulmuesin edhe atëherë.
Linku i shkurtër: balkanvijesti.com/v/S3djyiG4
