Novi Sad: I dyshuar për vrasjen e nënës me thikë, i biri i saj i arrestuar

Një grua humbi jetën sot në orët e para të mëngjesit në një banesë në rrugën "Aleksa Shantiq" në Novi Sad. I dyshuar për vrasjen është biri i saj, sipas informacioneve të para nga policia serbe.

Sipas të dhënave paraprake, viktima është goditur me thikë rreth orës katër të mëngjesit. Shkaku i saktë i konfliktit ende nuk është sqaruar zyrtarisht.

Menjëherë pas njoftimit të rastit, në vendngjarje u dislokua një numër i madh policësh, ndërsa ekipet e hetuesisë kanë kryer këqyrjen e vendit të ngjarjes, e cila, sipas burimeve, vazhdoi disa orë.

Pak para orës gjashtë, policia e nxori të dyshuarin nga banesa e ndodhur në lagjen Grbavica të Novi Sadit dhe e dërgoi në stacionin policor për marrje në pyetje.

Në vendngjarje, i dyshuari u ekzaminua nga një ekip i ndihmës së shpejtë, ndërkohë që në banesë arritën edhe punonjës të shërbimit funerar, të cilët morën në ngarkim trupin e pajetë të viktimës.

Detaje më të sakta rreth rrethanave të krimit priten të bëhen të ditura pas njoftimit zyrtar të policisë dhe prokurorisë. Raste të dhunës familjare me pasoja fatale vazhdojnë të regjistrohen periodikisht në rajon, duke ngritur sërish shqetësime për mekanizmat e parandalimit.