Ostruzhnicë: Goditi veturën e policisë, në makinë gati nëntë kilogramë kokainë

Pjesëtarë të policisë kriminale të Novi Sadit kanë arrestuar D. M. (58), shtetas i Serbisë dhe i Sllovenisë, në automjetin e të cilit, afër Ostruzhnicës në periferi të Beogradit, janë gjetur rreth 8,957 kilogramë kokainë, njofton Ministria e Punëve të Brendshme e Serbisë.

Sipas njoftimit, i dyshuari nuk iu bind urdhrit të policisë për të ndaluar automjetin, më pas me Volkswagen-in e tij goditi veturën zyrtare të policisë dhe u përpoq të arratisej.

Gjatë këtij incidenti, tre policë kanë pësuar lëndime të lehta trupore. Megjithatë, i dyshuari është neutralizuar dhe privuar nga liria.

Gjatë kontrollit të automjetit, policia ka gjetur gati nëntë kilogramë kokainë. Vlera e saj në tregun e zi nuk është bërë e ditur zyrtarisht, por bëhet fjalë për një sasi që tejkalon ndjeshëm sekuestrimet e zakonshme.

D. M. ngarkohet me veprat penale prodhim i paautorizuar dhe vënie në qarkullim e narkotikëve, si dhe pengim i personit zyrtar në kryerjen e detyrës. Atij i është caktuar ndalimi deri në 48 orë, pas së cilës do të dërgohet me kallëzim penal në Prokurorinë e Lartë Publike në Beograd.

Fakti që arrestimi u krye nga policia e Novi Sadit në territorin e Beogradit tregon se aksioni ishte i planifikuar dhe i dyshuari ishte nën vëzhgim, megjithëse kjo nuk është konfirmuar zyrtarisht nga MPB-ja.

Ndërkohë, policia nuk ka saktësuar prejardhjen e drogës dhe destinacionin e saj, as vendin ku ajo ishte fshehur në automjet. Këto rrethana, si dhe lidhjet e mundshme të të dyshuarit me grupe të organizuara kriminale, do të jenë objekt i hetimeve të mëtejshme.

Ostruzhnica është një vendbanim në periferi të Beogradit, përmes të cilit kalon unaza rrugore e kryeqytetit, një aks i rëndësishëm tranzit për trafikun drejt Kroacisë dhe Evropës Perëndimore.

Serbia konsiderohet një nga pikat kryesore të tranzitit të kokainës drejt tregjeve të Evropës Perëndimore përgjatë të ashtuquajturës rrugë ballkanike, dhe policia serbe raporton rregullisht sekuestrime të sasive të mëdha. Sipas Kodit Penal, për këtë vepër parashikohet dënim me burg nga tre deri në dymbëdhjetë vjet.