Artistët protestuan në parkun Manjezh ditën kur hapej Salloni i Tetorit

Në Parkun Manjezh në Beograd mbrëmë u zhvillua një aksion protestues me emrin "Tetori 20.26", pikërisht në ditën kur tradicionalisht hapej Salloni i Tetorit. Tubimin e organizuan artistë dhe punonjës të kulturës, me mbështetjen e Bashkësisë së Artit dhe Kulturës.

Kolektivi joformal "Tetori 20.26" ka bërë të ditur se protesta përfaqëson një gjest kundërshtimi ndaj politikës aktuale kulturore, të cilën e cilësojnë si rrënim të kulturës dhe përvetësim të manifestimeve nga ana e atyre që quhen "shërbëtorë të regjimit". Sipas tyre, Salloni i Tetorit në këto rrethana kthehet, siç e kanë përshkruar, në "maskë dekorative për vjedhjen e burimeve publike, censurë, presion dhe represion ndaj fushës së artit dhe kulturës".

Data e tubimit nuk është e rastësishme. Bëhet fjalë për Ditën e Çlirimit të Beogradit, ditë kur vite me radhë tradicionalisht hapej Salloni i Tetorit. Organizatorët kanë sqaruar se këtë datë simbolike e kanë shfrytëzuar për të shënuar traditën antifashiste dhe për të kujtuar ekspozitën kundërshtuese "Tetori75", të iniciuar në vitin 1975 në Qendrën Kulturore Studentore nga kuratorja Dunja Bllazheviq. Në atë rast, artistë dhe kuratorë kishin folur për rolin shoqëror të artit dhe lidhjen e tij me vetëqeverisjen.

Gjysmë shekulli më vonë, siç bëjnë të ditur organizatorët, kolektivi "Tetori 20.26" vazhdon po atë linjë rezistence ndaj instrumentalizimit të artit. Protesta, sipas tyre, u shtri si mbështetje për të gjithë artistët dhe punonjësit e kulturës, të cilët prej dy vitesh raportohet se janë nën presione sistematike dhe u mohohen të drejtat elementare të punës.

Të pranishmit theksuan se aksioni kishte edhe një kuptim më të gjerë, si gjest solidariteti me studentët, punëtorët dhe qytetarët që, sipas tyre, luftojnë për liri dhe të drejtën për të ardhme.

Gjatë protestës u lexua edhe një citat i kuratores Bojana Pejiq, i shënuar para gjysmë shekulli në katalogun e ekspozitës "Tetori75".

Vetëm kur të kuptojmë dhe zbatojmë vërtet se arti është një akt me përgjegjësi shoqërore, po aq sa çdo akt tjetër shoqëror, do të mund të themi se arti është çliruar më në fund nga autoriteti i tij dekorativ.

Organizatorët njoftuan se aktivitetet e kolektivit "Tetori 20.26" do të vazhdojnë, në varësi të zhvillimeve të mëtejshme në sektorin e kulturës.