Dodiku sulmon gazetarin e BHRT-it: „Ktheja mikrofonin, ti s'je publiku“

Konferenca për shtyp e thirrur dje nga Qeveria e Republika Srpskës, lidhur me situatën në Termocentralin Ugljevik, u shndërrua në një përplasje verbale, kur lideri i SNSD-së, Milorad Dodik, sulmoi gazetarin e Shërbimit Publik Radiotelevizion të Bosnjë-Hercegovinës (BHRT), Vladimir Shushak.

Sipas të dhënave nga vendi i ngjarjes, Shushak i kishte parashtruar pyetje kryeministrit të Republika Srpskës, Sava Minić, në lidhje me sasinë e qymyrit që do të sigurohet për termocentralin, çmimin dhe origjinën e furnizimit, si dhe natyrën e kontratave ndërkombëtare për pajisjet. Në vend të Minićit, në pyetje reagoi vetë Dodik.

„Çfarë të intereson ty, ti s'je publiku“, i tha Dodik gazetarit. Shushak iu përgjigj se pikërisht kjo është çështje e interesit publik, ndërsa Dodik replikoi: „Televizioni ynë është RTRS“.

Kur gazetari këmbënguli që përgjigjen ta japë kryeministri Minić, fjalën e mori përsëri Dodik.

„Të them ty, ti s'je publiku këtu, unë do të të përgjigjem, po përpiqesh të keqpërdorësh situatën, ne nuk na intereson BHRT-ja“, deklaroi Dodik.

Lideri i SNSD-së më pas i kërkoi disa herë gazetarit të „kthejë mikrofonin“, duke theksuar se në konferencë ishin të pranishëm edhe gazetarë të tjerë që prisnin radhën.

Megjithatë, Dodik vlerësoi se aktualisht nuk është e mundur të flitet për çmimet e qymyrit apo për marrëveshjen ndërshtetërore, duke e akuzuar gazetarin se kishte ardhur vetëm për të bërë „spekulime“.

„Nuk ka mundësi që tani të flitet për çmimin. Eja, more, shko. Gjithmonë me qëllim të keq, gjithmonë me pakënaqësi“, tha Dodik, duke shtuar se është e logjikshme që për momentin të mos flitet për çmimet dhe kontratën, por gazetari i BHRT-it, sipas tij, insiston në spekulime.

Incidenti ndodhi para gazetarëve të tjerë të pranishëm, ndërsa regjistrimi i shkëmbimit të fjalëve mes Dodikut dhe Shushakut u transmetua shpejt në mediat rajonale. Sipas burimeve, pyetjet në lidhje me të ardhmen e Termocentralit Ugljevik, respektivisht se kur dhe në çfarë kushtesh do të sigurohen sasitë e nevojshme të qymyrit, mbeten deri më tani pa përgjigje konkrete nga autoritetet kompetente.