KQZ e Bosnjës shpall zgjedhjet e përgjithshme për 4 tetor, mbi 3,4 milionë votues

Komisioni Qendror Zgjedhor i Bosnjë-Hercegovinës (CIK) miratoi njëzëri të enjten, më 7 maj, vendimin për shpalljen dhe mbajtjen e zgjedhjeve të përgjithshme, të cilat do të mbahen të dielën, më 4 tetor 2026. Për vendimin votuan të gjithë anëtarët e Komisionit.

Në zgjedhjet e tetorit qytetarët do të zgjedhin anëtarët e Presidencës së BeH-së, deputetët e Dhomës së Përfaqësuesve të Kuvendit Parlamentar të BeH-së, deputetët e Dhomës së Përfaqësuesve të Parlamentit të Federatës së BeH-së dhe të Kuvendit Popullor të Republikës Sërpska, presidentin dhe nënpresidentët e Republikës Sërpska, si dhe deputetët e kuvendeve kantonale në Federatë.

Sipas Listës Qendrore të Votuesve, të drejtë vote në këto zgjedhje kanë mbi tre milionë e 414 mijë votues.

CIK përcaktoi edhe afatet e veprimeve zgjedhore. Rezultatet duhet të përcaktohen dhe të publikohen më së voni deri më 20 nëntor 2026, ndërsa me vendim janë përcaktuar edhe afatet për regjistrimin e subjekteve politike dhe kandidatëve.

Në të njëjtën mbledhje Komisioni shqyrtoi edhe Rregulloren për përdorimin e teknologjive zgjedhore, e cila, siç bëhet e ditur, këtë vit do të zbatohet për herë të parë në masë të plotë.

Zgjedhjet e përgjithshme në Bosnjë-Hercegovinë mbahen çdo katër vjet, ndërsa të fundit u mbajtën në tetor 2022. Në Republikën Sërpska ky do të jetë edhe votimi i rregullt për presidentin e entitetit, pasi në nëntor 2025 u mbajtën zgjedhje të parakohshme për këtë post.