Plenkoviq: Fjalimi i Vuçiqit në OKB, fushatë denigruese pa bazë

Kryeministri i Kroacisë, Andrej Plenkoviq, ka reaguar ndaj fjalimit të presidentit serb Aleksandar Vuçiq, mbajtur në Asamblenë e Përgjithshme të Kombeve të Bashkuara, duke e cilësuar atë si "fushatë denigruese pa bazë" kundër Kroacisë.

Sipas Plenkoviqit, deklaratat e Vuçiqit e largojnë edhe më shumë Serbinë nga vlerat evropiane dhe nga anëtarësimi në Bashkimin Evropian.

Vuçiq, në fjalimin e tij para asamblesë së OKB-së, e akuzoi Kroacinë se krenohet me të kaluarën naziste, duke thënë se populli serb nuk mund të pranojë atë që ai e quajti "ringjallje e fantazmave më të tmerrshme të së kaluarës". Ai përmendi gjithashtu vuajtjet e serbëve, hebrenjve dhe romëve në Jasenovac, duke theksuar se "predikimet morale" nga Kroacia janë të papranueshme për Serbinë.

Duke iu përgjigjur pyetjeve të gazetarëve për fjalimin e Vuçiqit, Plenkoviq tha se ky reagim ishte i pritshëm, pas kritikave që ai vetë kishte drejtuar ndaj Serbisë për mënyrën se si u trajtua varrimi i të dënuarit për krime lufte, Ratko Mlladiq, i cili u shoqërua me nderime shtetërore dhe ushtarake.

"Në vend që të pendohej për atë që bënë, ai qartazi vazhdon me këtë fushatë denigruese pa bazë kundër Kroacisë, në të cilën as ai vetë nuk beson, e lëre më bashkësia ndërkombëtare", tha Plenkoviq.

Kryeministri kroat shtoi se çdo deklaratë e tillë përfaqëson edhe një hap më larg nga vlerat që ndahen brenda Bashkimit Evropian dhe nga anëtarësimi i Serbisë në BE.

Bashkëpunimi BE-Gjiri

Duke folur për bashkëpunimin mes Bashkimit Evropian dhe vendeve të Gjirit, Plenkoviq theksoi se Kroacia, si kryesuese aktuale e grupit MED9, ka rol të rëndësishëm në forcimin e këtij partneriteti.

Ai njoftoi se pas një muaji do të mbahet në Rijad samiti i dytë i BE-së me vendet e Gjirit, ku çështjet kryesore do të jenë siguria, energjetika dhe çështjet klimatike.

I pyetur për situatën në Lindjen e Mesme, Plenkoviq theksoi rëndësinë e lirisë së lundrimit dhe zbatimit të Konventës së OKB-së për të Drejtën e Detit, si dhe vazhdimin pa pengesa të tregtisë botërore.

Sipas tij, Kroacia është e interesuar për thellimin e mëtejshëm të partneritetit BE-Gjiri, duke përmendur edhe marrëdhëniet e mira bilaterale që Kroacia i ka tashmë me shumë vende të asaj rajoni.