Kryeministri i Kroacisë, Andrej Plenkoviq, njoftoi se qeveria do të sigurojë në buxhetin e ri 11 milionë euro për financimin e kontrolleve shëndetësore të fëmijëve dhe sportistëve të rinj deri në moshën 18 vjeç. Qëllimi, siç tha ai, është zbulimi në kohë i rreziqeve të mundshme shëndetësore përpara se sportistët e rinj të fillojnë pjesëmarrjen në gara të rangut më të lartë.
Plenkoviq e bëri këtë njoftim gjatë një takimi me delegacionin e Federatës Kroate të Sportit Akademik, mbajtur në Bibliotekën Kombëtare dhe Universitare në Zagreb. Në takim ishte i pranishëm edhe ministri i Turizmit dhe Sportit, Tonçi Gllavina.
Kryeministri theksoi se investimi në shëndetin dhe sigurinë e sportistëve është veçanërisht i rëndësishëm dhe se mjetet financiare për kontrollet sigurohen në përputhje me ligjin e ri për sportin. Sipas tij, fondet totale për sport janë rritur tetë herë krahasuar me vitin 2016, çka sipas tij pasqyrohet edhe në rezultatet sportive.
Studentët kroatë kanë fituar gjithsej 43 medalje, 18 të arta, 13 të argjendta dhe 12 të bronzta. Plenkoviq i vlerësoi këto rezultate si sukses mbi pritshmëritë, duke shtuar se dy universitete kroate renditen mes pesë më të suksesshmëve në Evropë, ndërsa Kroacia është shteti i dytë më i suksesshëm në sportin akademik evropian.
Lojërat Universitare Evropiane 2028 në Split
Kryeministri konfirmoi se qeveria do të mbështesë financiarisht Lojërat Universitare Evropiane, që do të mbahen në verën e vitit 2028 në Split, si dhe modernizimin e infrastrukturës sportive të nevojshme. Në lojëra pritet pjesëmarrja e mbi 5.000 sportistëve nga mbi 400 universitete evropiane prej 45 vendesh, me gara në 19 deri në 24 sporte, në mbi 50 lokacione.
Mes lokacioneve të parapara është edhe Spaladium Arena, e ndërtuar në vitin 2009 për Kampionatin Botëror të Hendbollit, e cila aktualisht gjendet në gjendje teknike shumë të dobët për shkak të depërtimit të zgjatur të ujit, që ka dëmtuar dhe në masë të madhe shkatërruar sistemet teknike dhe instalimet. Kroacia do të jetë nikoqire e Lojërave Universitare Evropiane për herë të dytë, pasi Zagrebi dhe Rijeka i pritën në vitin 2016.
Ministri Gllavina tha se gjatë mandatit të kësaj qeverie, buxheti i Federatës së Sportit Akademik është rritur pesë herë, dhe se vetëm në dhjetë vitet e fundit janë siguruar mbi 10 milionë euro për programet e federatës.
"Pikërisht për këtë qeveria vazhdimisht mbështet zhvillimin e sportit akademik", tha Gllavina, duke shtuar se Lojërat e vitit 2028 do të jenë rast për promovimin e sportistëve, universiteteve dhe Kroacisë, si dhe për investime të rëndësishme në infrastrukturën sportive.
Kryetari i Komitetit Olimpik Kroat, Josip Varvodiq, i përgëzoi sportistët për rezultatet, ndërsa theksoi rëndësinë e harmonizimit të detyrimeve sportive dhe akademike. Ai përshëndeti edhe vendimin e fundit të qeverisë për ndërtimin e Qendrës për Sporte Ujore në Zagreb. Kryetari i Federatës së Sportit Akademik, Nikolla Vinçetiq, u shpreh mirënjohës ndaj sportistëve, profesorëve, trajnerëve dhe qeverisë për mbështetjen e vazhdueshme.
Linku i shkurtër: balkanvijesti.com/v/25qupDOa
