MPB: Tetë të arrestuar, mes tyre ish drejtor i "Elektranave të Beogradit"

Pjesëtarët e Ministrisë së Punëve të Brendshme (MPB) të Serbisë kanë arrestuar tetë persona të dyshuar për keqpërdorim të pozitës zyrtare dhe pastrim parash, në lidhje me ndarjen e dhurimeve nga Ndërmarrja Publike Komunale "Elektranat e Beogradit". Lajmi u bë i ditur përmes një njoftimi zyrtar të MPB-së.

Sipas njoftimit, R. B. dyshohet se, në cilësinë e drejtorit të kësaj ndërmarrjeje, nga 27 nëntori 2020 deri më 1 qershor 2022, ka marrë pa bazë ligjore dhjetë vendime për ndarjen e dhurimeve ndaj shoqatave dhe organizatave të ndryshme, në vlerë të përgjithshme prej 14,1 milionë dinarësh.

Drejtoresha e atëhershme ekzekutive për çështje ekonomike-financiare të ndërmarrjes, D. I., dyshohet për ndihmë në keqpërdorim të pozitës zyrtare, pasi sipas hetuesve ka realizuar pagesat e dhurimeve edhe pse ka ditur se ato ishin pa bazë.

Për pastrim parash dyshohen Zh. V., B. M., A. K., M. G., M. R. dhe A. N. Sipas të dhënave të MPB-së, ata janë dakorduar që paratë e derdhura te shoqatat sportive në emër të dhurimeve të tërhiqeshin në para të gatshme, ku rreth 90 për qind të shumës i dorëzohej Zh. V., ndërsa 10 për qind të mbetur mbahej si provizion.

Gjashtë milionë dinarë në para të gatshme

Në këtë mënyrë, përmes tetë dhurimeve, janë tërhequr gjithsej gjashtë milionë dinarë në para të gatshme, shumë e cila nuk është arsyetuar në kontabilitet ose është paraqitur përmes llogarive të tjera, me qëllim krijimin e përshtypjes se paratë ishin shpenzuar për qëllimin e paraparë.

Siç bëhet e ditur nga MPB, R. B. dyshohet për keqpërdorim të pozitës zyrtare, D. I. për ndihmë në këtë vepër penale, ndërsa të gjashtët e tjerë për pastrim parash. Të gjithëve u është caktuar ndalimi deri në 48 orë, pas së cilës do të dërgohen në Prokurorinë e Lartë Publike në Beograd.

Më herët gjatë ditës u bë i ditur se mes të arrestuarve ndodhet edhe ish-ministri i Ekonomisë dhe ish-drejtori i "Elektranave të Beogradit", Rade Basta. Sipas të dhënave nga faqja zyrtare e ndërmarrjes, Dragica Ikodinoviq ka kryer funksionin e drejtoreshës ekzekutive për çështje ekonomike-financiare.

Hetimi i rastit vazhdon, ndërsa pritet që të dyshuarit të dalin para Prokurorisë së Lartë Publike në Beograd për vendim mbi masat e mëtejshme.