Çmimi i peletit arrin deri në 52.000 dinarë për ton në Serbi

Çmimi i peletit në Serbi këtë vjeshtë ka tejkaluar 50.000 dinarë për ton, sipas të dhënave të publikuara nga gazeta Danas, të cilat i citoi edhe agjencia N1. Në disa depo, një ton i këtij lënde djegëse kushton deri në 52.000 dinarë, që përbën një rritje deri në 50 për qind krahasuar me vitin e kaluar.

Ofertat më të lira, sipas burimeve, lëvizin nga 44.000 deri në 45.000 dinarë për ton, ndërsa te disa shitës peleti gjendet edhe për rreth 40.000 dinarë. Rritja e çmimeve ka nisur që gjatë verës, kur çmimet arritën në 44.000 dinarë për ton, megjithëse ekspertët zakonisht këshillojnë qytetarët ta blejnë peletin pikërisht në atë periudhë, kur kërkesa është më e ulët dhe çmimet më të favorshme.

Rritja e çmimeve nuk është veçori vetëm e Serbisë. Situatë e ngjashme është vërejtur edhe në Mal të Zi dhe në Bosnjë e Hercegovinë, megjithëse të dy vendet kanë rezerva të mëdha druri si lëndë e parë. Në Mal të Zi, siç bëhet e ditur, shteti ka vendosur edhe kufizim të çmimit të peletit për të mbrojtur konsumatorët.

Sipas sqarimit të profesorit të Fakultetit të Pylltarisë në Beograd, Branko Glavonjiq, rritja e çmimit është pasojë e kërkesës së shtuar, e shkaktuar nga rritjet e mëdha të çmimit të energjisë elektrike vitin e kaluar.

"Vitin e kaluar, kur u ul pragu për hyrje në zonën e kuqe të konsumit të energjisë elektrike, një numër i madh konsumatorësh vendosi të kalojë te peleti. Ata që nuk kishin përvojë menduan se është thjesht si në supermarket, shkon dhe blen atë që të duhet. Këta konsumatorë të rinj i zbrazën depot për disa ditë, e deri në mesin e dhjetorit pati probleme me furnizimet, pasi fabrikat nuk mund të prodhojnë dhe dorëzojnë sasi të mëdha peleti brenda një kohe kaq të shkurtër", ka theksuar Glavonjiq.

Në Bosnjë e Hercegovinë çmimet gjithashtu janë në rritje, ku peleti më i shtrenjtë kushton deri në 458 euro për ton, ndërsa kufiri i poshtëm është rreth 300 euro. Pelet me cilësi më të ulët mund të gjendet edhe diçka më lirë.

Qytetarët që në vitet e kaluara kishin kaluar në ngrohje me pelet, me shpresën se do t'i shmangnin rritjet e çmimit të energjisë elektrike, këtë vjeshtë po përballen me kosto dukshëm më të larta të sezonit të ngrohjes.