SPAK sekuestron pasuri 77 milionë lekë nga grupi i trafikut të kokainës

Struktura e Posaçme Kundër Korrupsionit dhe Krimit të Organizuar (SPAK) njoftoi më 22 tetor se ka sekuestruar pasuri me vlerë 77 milionë lekë, pronë e dy anëtarëve të një grupi të strukturuar kriminal. Masa është marrë në kuadër të hetimit për trafik kokaine dhe pastrim parash, çështje që ndiqet që prej vitit 2023.

Sipas njoftimit zyrtar, Gjykata e Posaçme e Shkallës së Parë ka marrë më 14 tetor vendimin nr. 667, me të cilin është urdhëruar sekuestro parandaluese e pasurive të luajtshme dhe të paluajtshme në pronësi të shtetasve me inicialet A.Ç. dhe F.C.

Nën sekuestro ka kaluar një sipërfaqe toke prej 2.000 metrash katrorë në zonën e Sharrës, në periferi të Tiranës, 100 për qind e kuotave të shoqërisë "Check Company Sh.p.k." me seli në Tiranë, si dhe 25 automjete të regjistruara në emër të kësaj kompanie. Mes mjeteve të sekuestruara janë 24 automjete të markës Volkswagen dhe një Toyota.

Procedimi penal, i regjistruar me numër 187/2023, po ndiqet për veprat penale të krimit të organizuar, trafikut të lëndëve narkotike dhe pastrimit të parave. Sipas burimeve nga SPAK, bëhet fjalë për një organizatë kriminale me veprimtari të gjerë ndërkombëtare, e cila ka bashkëpunuar me grupe të tjera për transportin e sasive shumëtonëshe kokaine nga Amerika Latine drejt porteve evropiane.

Siç bëhet e ditur, droga transportohej drejt porteve të mëdha evropiane, përfshirë Hamburgun dhe Antwerpen-in, ndërsa fitimet e realizuara investoheshin nga grupi në pasuri të paluajtshme dhe biznese, si në Shqipëri ashtu edhe jashtë saj.

Bashkëpunim me Europolin dhe shtete evropiane

Hetimi, sipas të dhënave të disponueshme, është mbështetur në analizën e komunikimeve të shifruara të platformës SkyECC. Ai është zhvilluar në bashkëpunim me Europolin dhe autoritetet e Belgjikës, Francës, Holandës, Gjermanisë dhe Italisë.

Gjatë hetimit është përcaktuar roli i secilit prej anëtarëve të grupit kriminal, si dhe e gjithë zinxhiri i transferimit të parave të përfituara nga veprimtaria e paligjshme.

Në kuadër të këtij procedimi penal, masa sigurimi janë vendosur ndaj 16 personave. Hetimet vazhdojnë.