Vdiq regjisori qilian Sebastian Lelio, fitues i Oskarit për "A Fantastic Woman"

Regjisori dhe skenaristi qilian Sebastian Lelio, autor i filmit të vlerësuar me Oskar "A Fantastic Woman", ka vdekur të premten në Santiago në moshën 52-vjeçare. Lajmin e ka konfirmuar familja e tij.

Sipas gazetës qiliane "El Mercurio Online", Lelio është gjetur i vdekur në banesën e tij në Las Condes, një lagje e Santiagos, nga partnerja e tij, aktorja Amalia Kassai. Vetë Kassai ka shkruar në Instagram se vdekja ka ndodhur për shkaqe shëndetësore.

"Po kalojmë një periudhë shumë të dhimbshme, kujtimi i tij do të mbetet përgjithmonë me ne", ka shkruar Kassai.

Familja e regjisorit ka theksuar në një njoftim se Lelio ka dhënë një kontribut të rëndësishëm për kulturën qiliane në momente të caktuara historike dhe ka kërkuar respektim të privatësisë në këtë periudhë. Sipas AFP, prokuroria ka hapur hetim për të përcaktuar shkakun e saktë të vdekjes.

Karriera dhe suksesi me "A Fantastic Woman"

Lelio lindi më 8 mars 1974 në Argjentinë, kurse familja u shpërngul në Vina del Mar, në Kili, kur ai ishte dy vjeç. Studioi në Shkollën e Filmit të Kilit dhe pas disa filmave të shkurtër realizoi filmin e tij të parë me metrazh të gjatë, "The Sacred Family", i vërejtur në festivalin e San Sebastianit.

Njohjen e parë ndërkombëtare ia solli filmi "Gloria" nga viti 2013, për të cilin aktorja kryesore Paulina Garcia fitoi çmimin Ariu i Argjendtë për rolin më të mirë femëror në Berlinale.

Reputacionin ndërkombëtar e forcoi me "A Fantastic Woman", histori për një kamariere transgjinore që përballet me vdekjen e partnerit të saj. Përveç Oskarit, filmi fitoi edhe Ariun e Argjendtë në Berlinale dhe nxiti një debat publik që ndihmoi në ndryshimin e ligjit në Kili, duke mundësuar njohjen ligjore të ndryshimit të gjinisë. Ishte filmi i parë qilian i nderuar me Oskar.

Pas suksesit me Oskarin, Lelio regjisoi në Hollywood filmat "Disobedience" (2017) me Rachel Weisz dhe Rachel McAdams, "Gloria Bell" (2018), një version të ri të filmit të tij me Julianne Moore, si dhe "The Wonder" (2022) me Florence Pugh. Sipas mediave qiliane, ai ishte duke punuar në një adaptim të romanit "Poeti qilian".