Fier: arrestohen dy ish-drejtorë të zyrës kadastrale për falsifikim dokumentesh

Policia e Fierit ka arrestuar dy ish-drejtorë të ish-Zyrës Vendore të Regjistrimit të Pasurive të Paluajtshme, të dyshuar se, në bashkëpunim me një juriste të Agjencisë Shtetërore të Kadastrës (ASHK), kanë regjistruar në pronësi të një shtetasi një sipërfaqe toke duke falsifikuar dokumentacionin përkatës.

Siç bëhet e ditur nga Drejtoria Vendore e Policisë Fier, masa e sigurisë "arrest në burg" u zbatua më 16 shtator, në kuadër të operacionit të quajtur "Toka e vjedhur".

Aksioni u krye nga efektivë të Seksionit të Hetimit të Krimeve Ekonomike dhe Financiare, me mbështetjen e njësisë speciale "Shqiponja" dhe strukturave të tjera operative. Urdhrin e arrestit e ka dhënë Gjykata e Rrethit Gjyqësor Fier.

Sipas policisë, të dyshuarit kanë shfrytëzuar pozicionet e tyre të punës për të regjistruar një pasuri të paluajtshme në emër të shtetasit K. H., duke falsifikuar dokumentet e nevojshme për këtë proces.

Hetimi ka nisur gjatë vitit 2025 dhe është zhvilluar me metoda proaktive, në bashkëpunim të ngushtë me Prokurorinë e Fierit. Pas grumbullimit të provave, policia ka kërkuar dhe ka marrë miratimin gjyqësor për heqjen e lirisë së të dyshuarve.

Në total janë zbatuar katër masa sigurie, me bashkëpunimin e drejtorive të policisë së Tiranës dhe Vlorës, ku ndaj të dyshuarve janë marrë edhe masa personale e pasurore.

Dokumentacioni i plotë procedural i është përcjellë Prokurorisë pranë Gjykatës së Rrethit Gjyqësor Fier, për vazhdimin e hetimeve. Çështja mbetet në proces hetimor.