Monica Bellucci feston 60-vjetorin, ende quhet gruaja më e bukur e botës

Aktorja italiane Monica Bellucci feston këtë javë 60-vjetorin e lindjes. Prej më shumë se tri dekadash ajo konsiderohet një nga gratë më të bukura në planet dhe ka ndërtuar një karrierë të suksesshme në kinematografinë italiane, franceze dhe atë të Hollywood-it.

Bellucci lindi në qytezën e vogël Città di Castello, rreth 50 kilometra larg Perugias, ku më vonë studioi drejtësi. Sipas të dhënave, ajo u rrit si fëmijë i vetëm në familjen e fermerit Pasquale Bellucci dhe piktores Brunella Briganti, prej së cilës, sipas shumëkujt, ka trashëguar bukurinë.

Tregohet se që në fëmijëri Monica ishte aq e bukur sa një shef kuzhine i një restoranti refuzoi të merrte para nga prindërit e saj, i mahnitur nga pamja e vajzës së vogël. Edhe mësuesit i ishin admirues, pasi ishte nxënëse e shkëlqyer, dhe një prej tyre madje e portretizoi.

Si vajzë e re nuk ishte veçanërisht shoqërore, duke preferuar kohën me prindërit sesa lojërat me fëmijët e tjerë. Dashuronte librat dhe e imagjinonte veten avokate, mirëpo më vonë braktisi studimet universitare për t'iu përkushtuar modelingut, pasi një shoqe e saj e çoi në agjencinë Elite Model në Milano, ku iu ofrua menjëherë kontratë.

Deri në vitin 1989 ajo u kthye në një nga fytyrat më të njohura të skenës së modës, duke u shfaqur në kopertina revistash dhe duke bashkëpunuar me marka të njohura. Në vitin 1990 u martua me fotografin Claudio Basso, martesë që përfundoi pas katër vitesh.

Paralelisht me karrierën e modelingut, Bellucci filloi mësimet e aktrimit dhe u zbulua nga regjisori Francis Ford Coppola, i cili në vitin 1992 i dha rolin e parë të madh në filmin "Drakula". Katër vjet më vonë luajti në filmin francez "L'Appartement", ku njohu edhe aktorin Vincent Cassel, me të cilin u martua në vitin 1999. Çifti u nda në vitin 2013, ndërsa nga martesa lindën dy vajza, Deva dhe Leonie.

Suksesi në Hollywood dhe jeta private

Famën botërore Bellucci e fitoi në vitin 2000 falë rolit kryesor në filmin "Malèna". Më vonë u shfaq edhe në dy pjesët vijuese të serialit "Matrix", si dhe në filmin e diskutuar "The Passion of the Christ" të regjisorit Mel Gibson, ku interpretoi Marien Magdalenë.

Pas ndarjes nga Cassel, mediat e huaja e lidhën për një kohë emrin e saj me biznesmenin azerbajxhanas Telman Ismailov, i arrestuar në Mal të Zi në vitin 2021 sipas kërkesës së Interpolit, gjë që Bellucci e mohoi duke thënë se ishte thjesht miqësi. Ndërmjet 2017 dhe 2019 ishte në lidhje me artistin francez Nicolas Lefebvre, 18 vjet më i ri se ajo.

Prej dy vitesh Bellucci është në lidhje me regjisorin e njohur Tim Burton, me të cilin janë parë shpesh publikisht që nga tetori i vitit të kaluar, kur lidhjen e konfirmuan zyrtarisht në festivalin e filmit në Romë.

"E di atë si njeri, e dua, dhe tani po njoh edhe regjisorin, fillon një aventurë tjetër. E dua Timin dhe e respektoj shumë," ka thënë aktorja për revistën Elle France.

Bellucci aktualisht luan në filmin e ri të Burton-it, vazhdim i "Beetlejuice", krah Jenna Ortega, Michael Keaton dhe Winona Ryder. Për ditëlindjen dhe plakjen, ajo ka thënë se nuk mund të luftosh kohën, por duhet të bësh paqe me të dhe të shpresosh se do të të trajtojë me mirëkuptim.