Prishtinë: pezullohen tre policë për dyshime të ngacmimit seksual të një vajze

Inspektorati Policor i Kosovës (IPK) ka pezulluar më 16 tetor tre polic të rinj të Policisë së Kosovës, të dyshuar për ngacmim seksual ndaj një vajzeje dhe për kontroll të paligjshëm. Rasti ndodhi në Prishtinë, ndërsa sipas udhëzimit të prokurorit të Prokurorisë Themelore në Prishtinë, kundër tyre është ngritur procedurë penale.

Sipas burimeve pranë prokurorisë, vajza është ndaluar nga patrulla pas orës 01:00, menjëherë pasi kishte dalë nga një klub nate. Siç bëhet e ditur, meqë nuk kishte me vete letërnjoftimin, njëri nga policët i ka kërkuar llogarinë e saj në Snapchat, ndërsa më pas i ka propozuar që të shkonin bashkë në një motel në zonën e Çagllavicës.

Gjatë kontrollit, vajza e ka thirrur tezen e saj, e cila është pjesëtare e Policisë së Kosovës. Ajo është nisur menjëherë në vendngjarje dhe është ballafaquar me të tre policët, pas së cilës i ka dorëzuar komandës një raport të detajuar për sjelljen e kolegëve të saj.

Eprorët e kanë përcjellë menjëherë rastin te Inspektorati Policor i Kosovës për veprime të mëtejshme. Pas verifikimeve të kryera, me urdhër të prokurorisë është hapur hetim penal ndaj tre policëve të dyshuar.

Ministri i Punëve të Brendshme, Xhelal Sveçla, ka përshëndetur pezullimin dhe angazhimin e IPK-së dhe të Policisë së Kosovës në këtë rast. Ai ka theksuar se nuk do të lejojë që individë të caktuar të dëmtojnë imazhin e institucionit.

„Nuk do të lejojmë në asnjë mënyrë që ndonjë individ ta njollosë Policinë e Kosovës dhe pjesëtarët e saj, të cilët shërbejnë në mënyrë profesionale për sigurinë e qytetarëve dhe të vendit tonë“, ka shkruar Sveçla në Facebook.

Ministri ka theksuar se misioni i Policisë së Kosovës është shërbimi ndaj qytetarëve dhe se çdo keqpërdorim i detyrës zyrtare duhet të ndëshkohet pa kompromis. Ai ka shtuar se besimi i qytetarëve te policia ndërtohet mbi profesionalizëm, integritet dhe përgjegjësi, ndërsa Inspektorati Policor i Kosovës ka rol kyç në garantimin e kësaj llogaridhënieje.

Hetimi ndaj tre policëve të pezulluar vazhdon.