Split: 57 persona të arrestuara pas përleshjeve mes Torcidës dhe tifozëve të Ajax-it

Promenada e njohur Riva në Split u shndërrua të mërkurën në mbrëmje në skenë kaosi, vetëm një ditë para përballjes futbollistike mes Hajdukut dhe Ajax-it në raundin e parë të Ligës së Konferencës. Sipas medieve kroate, rreth 150 anëtarë të grupit të tifozëve Torcida sulmuan tifozët e klubit holandez, ndërsa policia u detyrua të ndërhynte për të parandaluar një përplasje më të madhe.

Incidenti ndodhi rreth orës 22.30, në zemër të qytetit. Shefi i Drejtorisë së Policisë së Split-Dalmacisë, Marko Srdarević, tha në një konferencë për media se forcat e rendit vërejtën grumbullimin e tifozëve holandezë dhe anëtarëve të Torcidës në Riva rreth orës 23.30, pas së cilës policia përdori mjete shtrënguese për të ndarë palët e përfshira.

Sipas vlerësimeve të policisë, në trazira morën pjesë rreth 500 persona gjithsej, prej të cilëve rreth 200 tifozë holandezë dhe rreth 300 përkrahës të Hajdukut. Janë arrestuar 57 persona, mes tyre 19 shtetas të Holandës, te të cilët janë gjetur thika.

Srdarević bëri të ditur se ky nuk ka qenë rast i izoluar. Sipas tij, të martën dhe të mërkurën janë regjistruar gjithsej katër incidente mes tifozëve të dy klubeve, në të cilat dy tifozë të Ajax-it kanë pësuar lëndime të lehta, ndërsa autorët janë arrestuar.

Policia ka njoftuar se për ditën e ndeshjes priten rreth 1.900 tifozë holandezë në qendër të qytetit, ndërsa pritet edhe ardhja e disa mijëra përkrahësve të Hajdukut. Masat e sigurisë janë shtuar, ndërsa gjendja në qytet mbetet e tensionuar.

Kreu i tifozëve të Ajax-it kërkon reagim nga UEFA

Incidenti ka tërhequr vëmendje të madhe të medieve në Holandë. Njëri nga liderët e shoqatës së tifozëve të Ajax-it, Fabian Nagtzam, deklaroi për televizionin AT5 se UEFA duhet të reagojë në mënyrën më të ashpër.

„Këto incidente po përsëriten. Sulmohen tifozë të zakonshëm që nuk kanë ardhur për të shkaktuar trazira. Skenarë të ngjashëm i kemi parë edhe në Athinë e Napoli, ndërsa në Marsejë nuk guxuam as të udhëtonim. Nëse këto gjëra vazhdojnë të përsëriten, UEFA thjesht duhet t'i përjashtojë klube të tilla nga garat evropiane“, tha Nagtzam.

Ai kishte paralajmëruar që të martën për rrezikun ndaj sigurisë së tifozëve që kishin udhëtuar drejt Splitit, duke treguar rastin e një tifozi që, pas një mbajtjeje të gjatë në aeroport dhe pasi zbriti nga taksia, u sulmua nga rreth njëzet persona të maskuar.

Personave të arrestuar, kryesisht shtetas holandezë te të cilët u gjetën thika dhe gurë, u janë shqiptuar me procedurë të shkurtuar dënime me burgim prej shtatë ditësh, bashkë me ndalim dyvjeçar për hyrje në stadiumin Poljud dhe në Riva. Policia ka njoftuar përforcime shtesë të sigurisë për ditën e ndeshjes.