Zelensky: Bisedimet trepalëshe në Abu Dhabi të mundshme nga 6 nëntori

Lufta në Ukrainë ka hyrë në ditën e saj të 1.712-të. Presidenti ukrainas Volodymyr Zelensky ka thënë se bisedimet trepalëshe në nivel teknik mes Ukrainës, Shteteve të Bashkuara dhe Rusisë mund të mbahen nga 6 deri më 10 nëntor në Abu Dhabi.

Në një intervistë për media amerikane, Zelensky është shprehur i kujdesshëm, duke theksuar se data dhe formati i takimit ende nuk janë përcaktuar përfundimisht.

Ndërkohë, Departamenti i Shtetit i SHBA-së ka miratuar shitjen e 500 raketave përgjuese PAC-3 MSE për sistemet e mbrojtjes ajrore "Patriot", në vlerë prej 2,1 miliardë dollarësh. Sipas Inside Defense, mjetet për blerjen e raketave do t'i sigurojnë partnerët dhe aleatët e Ukrainës.

Zelensky ka falënderuar administratën amerikane për miratimin e shitjes, por ka kërkuar që raketat të dërgohen tashmë gjatë dimrit të ardhshëm, periudhë kur, sipas tij, do të jenë më të nevojshme për mbrojtjen nga sulmet ruse.

Viktima në të dy anët e frontit

Policia rajonale e Sumy ka njoftuar se një grua 43-vjeçare është vrarë gjatë dhjetëra sulmeve ruse në rajon brenda 24 orëve. Në anën tjetër, në sulmin ukrainas me dron ndaj një shtëpie private në fshatin Klimovo të rajonit Bryansk kanë humbur jetën një burrë dhe një grua, ndërsa pesë civilë janë plagosur, ka bërë të ditur kreu i atij rajoni, Jegor Kovalçuk.

Forcat ruse kanë sulmuar gjatë natës lokacione për montimin dhe magazinimin e dronëve në Harkiv, si dhe punishte në zonën industriale Proton, ku prodhohen komponentë armatimi, sipas Ministrisë së Mbrojtjes ruse. Ndërkohë, banorë të Ufës kanë raportuar shpërthime pas sulmit të dronëve ukrainas ndaj një rafinerie nafte në qytet.

Zelensky ka thënë gjithashtu se banorë të Aljoshkës, zonë e rajonit Herson nën kontroll rus, kanë kaluar në territorin e kontrolluar nga Kievi, duke udhëtuar përmes Krimesë dhe Bjellorusisë drejt rajonit ukrainas Çernihiv.

Sekretari i Shtetit i SHBA-së, Marco Rubio, ka thënë se Zelensky mund të ftohet të marrë pjesë në Samitin e G20-s në dhjetor në Majami, "nëse Donald Trump vendos se diçka pozitive mund të rezultojë nga prania e tij".