Në Serbi sot zgjidhen këshillat kombëtarë të minoriteteve

Në Serbi sot kanë nisur në orën 7:00 zgjedhjet për anëtarët e këshillave kombëtare të minoriteteve. Siç bëhet e ditur nga organet zgjedhore, do të zgjidhen anëtarët e këshillave kombëtare të 23 minoriteteve, ndërsa vendvotimet do të qëndrojnë të hapura deri në orën 20:00.

Të drejtë vote kanë gjithsej 481.785 votues, të cilët do të mund të votojnë në njërin nga 949 vendvotimet e shpallura në të gjithë vendin. Për këto zgjedhje janë shpallur 52 lista zgjedhore, ndërsa janë shtypur 482.849 fletëvotime.

Ministria për të Drejta të Njeriut dhe të Minoriteteve dhe Dialog Shoqëror ka përcaktuar më herët se 21 minoritet kombëtar i plotëson kushtet për zgjedhje të drejtpërdrejta, ndërsa pjesëtarët e minoritetit goran dhe rus do t'i zgjedhin përfaqësuesit e tyre përmes kuvendit elektoral.

Në zgjedhjet e drejtpërdrejta do të zgjidhen anëtarët e këshillave kombëtare të minoritetit shqiptar, ashkali, boshnjak, bullgar, bunjevac, vllah, grek, egjiptian, hungarez, maqedonas, gjerman, polak, rom, rumun, rusin, sllovak, slloven, ukrainas, kroat, malazez dhe çek.

Numri i anëtarëve sipas minoriteteve

Zgjidhen nga 35 anëtarë të këshillave kombëtare të minoritetit boshnjak, hungarez dhe rom, 29 anëtarë të Këshillit Kombëtar të minoritetit shqiptar, më pas nga 23 anëtarë të këshillave kombëtare të minoritetit vllah, rumun, sllovak, kroat dhe malazez dhe nga 19 anëtarë të këshillave kombëtare të minoritetit bullgar, bunjevac, maqedonas dhe rusin.

Në zgjedhjet e drejtpërdrejta zgjidhen edhe nga 15 anëtarë të këshillave kombëtare të minoritetit ashkali, grek, egjiptian, gjerman, polak, slloven, ukrainas dhe çek. Përmes kuvendit elektoral do të zgjidhen 15 anëtarë të Këshillit Kombëtar të minoritetit goran dhe 19 anëtarë të Këshillit Kombëtar të minoritetit rus.

Zgjedhjet do t'i vëzhgojnë 204 vëzhgues vendas dhe të huaj. Vëzhguesit vendas vijnë nga shoqatat OKO, Bravo NS, Kreni-promeni, Budni, Kraj dhe Liberta NS, ndërsa 24 vëzhgues të huaj vijnë nga ambasada britanike, ambasada e Sllovakisë, ambasada e Shteteve të Bashkuara, Delegacioni i Bashkimit Evropian në Serbi dhe Misioni i OSBE-së. Zgjedhjet do t'i ndjekin edhe 1.194 përfaqësues të propozuesve të listave.

Zgjedhjet e rregullta për këshillat kombëtare të minoriteteve mbahen çdo katër vjet, aq sa zgjat mandati i një sazimi sipas Ligjit për Këshillat Kombëtare të Minoriteteve Kombëtare. Zgjedhjet e kaluara ishin mbajtur më 13 nëntor 2022.