Komisioni Qendror i Zgjedhjeve (KQZ) publikoi të enjten, më 4 mars, rezultatet përfundimtare të zgjedhjeve të parakohshme parlamentare të mbajtura më 14 shkurt 2021. Lëvizja Vetëvendosje (LVV) e Albin Kurtit fitoi 58 nga 120 ulëset në Kuvend.
Sipas të dhënave të KQZ-së, Vetëvendosje mori 438.334 vota, ose 49,95 për qind. Partia Demokratike e Kosovës (PDK) fitoi 148.296 vota ose 16,9 për qind dhe 19 mandate, Lidhja Demokratike e Kosovës (LDK) 110.978 vota ose 12,64 për qind dhe 15 mandate, ndërsa Aleanca për Ardhmërinë e Kosovës (AAK) 62.111 vota ose 7,07 për qind dhe tetë mandate.
Lista Serbe fitoi 44.404 vota, ose 5,06 për qind, dhe të dhjetë ulëset e garantuara për komunitetin serb. Nga dhjetë mandatet e rezervuara për komunitetet e tjera joshumicë, nga dy u takuan turqve dhe romëve, ndërsa Koalicioni Vakat, lista Hoxhiq dhe goranët fituan nga një mandat.
Personi më i votuar ishte Vjosa Osmani, kandidatja e Vetëvendosjes për presidente, me 300.788 vota. Pas saj renditen Glauk Konjufca me 200.641 dhe Arben Vitia me 107.813 vota.
Për zgjedhjen e qeverisë në Kuvend nevojiten 61 vota, që do të thotë se Vetëvendosje me 58 deputetë duhet të sigurojë mbështetjen e një pjese të deputetëve të komuniteteve joshumicë.
Ndaj rezultateve përfundimtare mund të parashtrohet ankesë në Panelin Zgjedhor për Ankesa dhe Parashtresa brenda 24 orësh, e më pas edhe në Gjykatën Supreme. Pas certifikimit vijon afati prej 30 ditësh për konstituimin e Kuvendit të ri, i cili më pas zgjedh qeverinë dhe presidentin, pasi mandati i ushtrueses së detyrës së presidentes, Vjosa Osmani, skadon në fillim të majit.
Linku i shkurtër: balkanvijesti.com/v/LyUci4dK
