Festivali Sea Dance rikthehet në Budva pas tre vjetësh pauzë dhe do të mbahet nga 28 deri më 31 gusht në plazhin Beçiçi, njoftuan organizatorët nga ekipi i festivalit EXIT.
Ndër emrat e parë të konfirmuar janë Charlotte de Witte, Peggy Gou, HUGEL, Enrico Sangiuliano, RPR Soundsystem dhe John Newman, i cili do të paraqesë programin e tij të ri koncertal. Sipas organizatorëve, së shpejti priten edhe emra të tjerë.
Hyrja në të gjitha netët e festivalit është falas, por vetëm me regjistrim paraprak. Pas konfirmimit të pjesëmarrjes, vizitorët marrin një biletë elektronike falas, me një depozitë të kthyeshme prej pesë eurosh. Biletat VIP janë në shitje.
Ky është aktiviteti i dytë i EXIT-it në Malin e Zi këtë vit. Pjesa e parë, e mbajtur në fillim të korrikut në Plazhin e Madh të Ulqinit, tërhoqi mbi 50.000 vizitorë, sipas të dhënave të organizatorëve.
Sea Dance u themelua në Malin e Zi në vitin 2014 dhe për vite ishte një nga festivalet më të mëdha verore në Adriatik. Në vitin 2023 festivali u largua nga vendi pas mosmarrëveshjeve kontraktuale me qeverinë e atëhershme. Themeluesi i EXIT-it, Dushan Kovaçeviq, ka deklaruar për media të huaja se kapaciteti në Beçiçi planifikohet mes 30.000 dhe 50.000 vetësh për natë, varësisht nga numri i të regjistruarve.
Rikthimi në Budva është pjesë e asaj që organizatorët e quajnë turne botëror të EXIT-it, pasi, sipas Kovaçeviqit, qeveria serbe ka bërë gjithçka për t'i dhënë fund traditës 25-vjeçare të festivalit në Petrovaradin. Regjistrimi për biletat falas është i hapur në faqen e festivalit.
Linku i shkurtër: balkanvijesti.com/v/Qxcl1Ubo
