Nëntë ortopedë kërcënojnë se do të largohen nga Qendra Klinike e Malit të Zi

Nëntë ortopedë të Qendrës Klinike të Malit të Zi (QKMZ) kanë paralajmëruar se do të largohen nga institucioni nëse nuk zgjidhet mosmarrëveshja rreth emërimit të Nikola Bulatoviqit si drejtor i Klinikës së Ortopedisë dhe Traumatologjisë, raportohet nga Podgorica.

Sipas burimeve, mjekët e dërguan shkresën me paralajmërim më 28 maj, duke kërkuar që emërimi i Bulatoviqit të anulohet. Ata e akuzojnë drejtorin e ri se është sjellë ndaj kolegëve në mënyrë fyese dhe poshtëruese, se ka kufizuar autonominë e tyre profesionale dhe u ka mohuar mundësitë për specializim.

Ortopedët pohojnë gjithashtu se, pas publikimit të shkresës, Bulatoviqi u ka drejtuar atyre kërcënime.

Drejtoria e QKMZ-së, në krye të së cilës është drejtori Aleksandar Radoviq, ka bërë të ditur se vepron në përputhje me dispozitat ligjore dhe se pacientët nuk do të rrezikohen. Ndërkohë, nëntë ortopedëve u është hequr pëlqimi për punë shtesë në të gjitha institucionet e jashtme, private dhe publike.

Puna shtesë u mundëson mjekëve të QKMZ-së që, me pëlqimin e drejtorisë, të operojnë edhe në institucione të tjera publike dhe private, dhe pikërisht në këtë mënyrë ortopedët nga Podgorica mbulonin spitalet ku mungojnë specialistët.

Ky vendim prek veçanërisht veriun e vendit, ku ortopedët nga Podgorica kryenin operacione me punë shtesë. Në Spitalin e Përgjithshëm të Beranës nuk pati operacione nga 15 gushti i vitit të kaluar deri më 1 shkurt të këtij viti, ndërsa Ministria e Shëndetësisë nuk ka sqaruar se si do të organizohen shërbimet ortopedike në atë pjesë të vendit.

Sipas të dhënave, ortopedët për momentin mbeten në vendet e tyre të punës, ndërsa nuk dihet ende nëse Bordi Drejtues i QKMZ-së apo Ministria e Shëndetësisë do ta shqyrtojnë kërkesën e mjekëve.