Filmi komedi “Falli 2” ka nisur rrugëtimin në kinematë shqiptare me një rezultat të spikatur. Siç bëhet e ditur, vetëm në katër ditë nga premiera janë shitur rreth 15.000 bileta.
Sipas producentit, regjisorit dhe aktorit të filmit, Marjus Dervishi, i njohur me emrin skenik Zebërvoki, kjo shifër përbën rekordin më të lartë për kinemanë shqiptare në gjashtë vitet e fundit.
I ftuar në emisionin “Studio Live” në Report TV, Dervishi u shpreh se reagimi i publikut në sallat e kinemasë ka qenë vendimtar për të dhe se filmi e ka përmbushur misionin me sukses. Ndërkohë, ai sqaroi se në fabulën e filmit të dytë është përpjekur të mos jetë i drejtpërdrejtë në mesazhin që përcjell, por të luajë me elementë dhe personazhe surprizë.
Sipas tij, “Falli 2” është ndërtuar si një komedi e jetuar dhe e përjetuar nga spektatori. Dervishi e cilëson personazhin e Rraketikut si “gjetjen” e filmit dhe si shtysën kryesore të komedisë.
Në film, përveç Dervishit, interpretojnë Marjana Kondi, Margent Çaushi, Klejdis Shehu, Selma Bakalli dhe Xhoana Karaj. Aktorja Marjana Kondi deklaroi për Report TV se puna në këtë projekt ka qenë një përvojë shumë pozitive.
Për krahasim, sipas të dhënave të ndara në nëntor 2023 nga menaxheri i marketingut në Cineplexx Albania, Klemi Sinakoli, filmi shqiptar me startin më të suksesshëm ka qenë “2 Gishtë Mjaltë”, i cili shiti mbi 35.000 bileta vetëm në javën e parë në kinematë e TEG dhe QTU. Ndër filmat pas pandemisë u veçuan “Në kuadër të dashurisë”, me mbi 40.000 bileta, dhe “Policë për kokë”, me mbi 35.000 bileta.
Sipas të dhënave të kinemasë Millennium në Tiranë, ku filmi shfaqet, “Falli 2” është një komedi me kohëzgjatje 113 minuta, me Marius Dervishin në rolin e regjisorit. Bëhet fjalë për filmin e dytë të kësaj historie, ndërsa suksesi në arka u shënua që në ditët e para të shfaqjes.
Linku i shkurtër: balkanvijesti.com/v/fo7QlrQD
