Mali i Zi digjet në 11 komuna: aeroplanët hodhën 138 tonë ujë brenda një dite

Zjarret janë aktive në territorin e 11 komunave të Malit të Zi, njoftoi të shtunën në mbrëmje Ministria e Punëve të Brendshme e këtij vendi.

Sipas njoftimit, në territorin e Podgoricës digjet në lokalitetet Momçe dhe Krzhanja në Kuç. Zjarr aktiv ka edhe në Plevla në Vranovinë, në Danillovgrad në Ponikvice, në Kollashin në Crni Vrh dhe Maganik, si dhe në Cetinë në Bijele Poljane, Lastva dhe Ubli Çevski.

Në komunën e Nikshiqit digjet në Bogetiq, Bijele Poljane dhe Krstac, në Shavnik në zonën Krnja Jela–Shtiçje dhe në Bare, në Pluzhine në malin e Pivës afër Kapavicës, në Mojkovac në Stub dhe Stubske Poljane, ndërsa në Tivar në Lisinj.

Sipas të dhënave të ministrisë, dy aeroplanë AT-802 kryen gjatë ditës 30 fluturime dhe hodhën 90 tonë ujë, ndërsa aeroplani AN-32P në gjashtë fluturime hodhi 48 tonë. Gjithsej nga ajri u hodhën 138 tonë ujë në 36 fluturime.

Ndërkohë, Ushtria e Malit të Zi angazhoi helikopterin Bell 412 në zonën e Nikshiqit, në lokalitetet Podkupiq dhe Cerovo, ku në tetë fluturime dhe shtatë orë fluturimi u hodhën edhe 52 tonë ujë.

Prioritet për shuarjen nga ajri, siç bëhet e ditur, kanë Krstaci, Bogetiqi dhe Bijele Poljane afër Cetinës, pastaj Vojniku, Boani, Krnja Jela dhe mali i Pivës.

Nga ministria deri tani nuk ka informacione për evakuime apo shtëpi të rrezikuara, dhe nuk është kërkuar ndihmë ndërkombëtare. Zjarrfikësit, policia dhe ushtria mbeten në të gjitha vatrat aktive edhe gjatë natës. Mali i Zi përballet çdo verë me zjarre të mëdha pyjore, ndërsa vitin e kaluar për shuarjen e tyre ishte aktivizuar edhe mekanizmi evropian i mbrojtjes civile.