Dy të vdekur në aksident mes dy automjeteve në Rrugën e Arbrit

Dy persona kanë humbur jetën pasi janë përplasur dy automjete paraditen e së shtunës, në afërsi të tunelit të Murrizit, në Rrugën e Arbrit.

Sipas njoftimit të policisë, aksidenti ka ndodhur rreth orës 10:15 në Xibër, ku janë përplasur dy mjete të drejtuara nga shtetasit B. O., rreth 42 vjeç, dhe A. F., rreth 45 vjeç.

Si pasojë e përplasjes, ka humbur jetën shtetasi Bledian Osmani, rreth 42 vjeç, njëri nga drejtuesit e automjeteve. Jetën e ka humbur edhe Maltina Ferati, e cila udhëtonte si pasagjere në automjetin e drejtuar nga A. F.

Pesë shtetas të tjerë, të përfshirë në aksident, janë dërguar në spital për kontroll mjekësor. Nuk është bërë e ditur gjendja shëndetësore e tyre.

Grupi hetimor ndodhet në vendngjarje dhe po punon për të sqaruar rrethanat në të cilat ka ndodhur aksidenti. Policia nuk ka dhënë ende detaje të tjera lidhur me shkaqet e mundshme të përplasjes.