Mbledhja e Asamblesë së Partisë Socialiste u mbyll të martën me paqartësi rreth fatit politik të Elisa Spiropalit dhe Plarent Ndrecës, pasi kërkesa e kryeministrit Edi Rama për përjashtimin e tyre nuk u vu në votim.
Sekretari i Përgjithshëm i PS, Blendi Klosi, në fjalën e tij në fund të mbledhjes, tha se Spiropali dhe Ndreca do të mbeten pjesë e Partisë Socialiste, duke lënë përshtypjen se kërkesa e Ramës ishte refuzuar ose shtyrë.
Deklarata shkaktoi menjëherë reagime dhe spekulime në media, ndaj disa orë më vonë Klosi doli me një sqarim në rrjetet sociale, duke korrigjuar atë që tha më herët.
Sipas tij, vendimi i Asamblesë ka të bëjë vetëm me largimin e të dyve nga forumet drejtuese të partisë, ndërsa anëtarësia e tyre si socialistë të thjeshtë nuk është prekur.
"Lajm i rremë", thotë Klosi
"Keqkuptimi padyshim i qëllimshëm i prononcimit për median ka prodhuar një lajm të rremë. Po, Elisa Spiropali dhe Plarent Ndreca nuk mund të jenë më pjesë e asnjë forumi të partisë. Por në një parti ku cilido aplikon online dhe bëhet anëtar, nuk ka sens përjashtimi edhe nga partia", deklaroi Klosi.
Ai shtoi se fakti që kërkesa për përjashtim nuk u votua në Asamble ka një shpjegim të thjeshtë. Sipas Klosit, tre anëtarë e kundërshtuan parimisht idenë e përjashtimit dhe e shprehën hapur qëndrimin e tyre, gjë që sipas tij e bëri të qartë përfundimin e mbledhjes pa nevojën e një votimi formal.
"Ky është fakti, ndërsa të tjerat janë konsum mediash që mund ta mbulojnë diellin me shoshe vetëm që u bë natë", tha ai.
Sipas informacioneve nga brenda mbledhjes, Fatmir Xhafaj, Erion Braçe dhe Pandeli Majko kanë qenë ata që janë kundërshtuar përjashtimin e Spiropalit, duke argumentuar se mosmarrëveshjet brenda Partisë Socialiste duhet të zgjidhen me dialog të brendshëm e jo me masa përjashtuese.
Çështja e largimit të Spiropalit dhe Ndrecës nga forumet e PS mbetet e hapur për komente të mëtejshme nga vetë të prekurit, ndërsa brenda radhëve socialiste vazhdojnë diskutimet rreth mënyrës si u trajtua kërkesa e kryeministrit Rama.
Linku i shkurtër: balkanvijesti.com/v/5JHVMs2O
