Një dramë e rrallë u zhvillua këtë mëngjes në një fluturim të kompanisë Flydubai, i cili udhëtonte nga Dubai për në Tel Aviv. Sipas dëshmive të pasagjerëve, njëri nga pilotët e aeroplanit ka tentuar ta rrëzojë atë, por ekuipazhi dhe pasagjerët arritën ta ndalojnë, duke shpëtuar jetën e të gjithë të pranishmëve në bord.
Sipas informacioneve të deritanishme, kontrollin e aeroplanit e ka marrë përsipër një ekuipazh i ri, i përbërë nga pilotë që rastisën të gjendeshin në fluturim si udhëtarë civilë.
Disa media kanë publikuar edhe një video të filmuar në momentet kur në aeroplan po zhvillohej drama. Në pamje shihen pasagjerë të shqetësuar, ndërsa disa prej tyre kishin ulur kokën drejt dyshemesë, në atë që dukej si lutje. Në sfond, gjatë gjithë kohës, dëgjohen britma të pasagjerëve të tmerruar.
Sipas dëshmive të pasagjerëve, të raportuara nga mediat izraelite, në fillim është dëgjuar britmë nga kabina e pilotëve, ndërsa kur janë hapur dyert, pasagjerët kanë parë gjak.
Mediat izraelite bëjnë të ditur se kapiteni i aeroplanit ishte me kombësi ruse, ndërsa oficeri i parë ishte ukrainas. Flydubai nuk ka konfirmuar zyrtarisht kombësinë apo emrat e tyre.
Nga Flydubai është bërë e ditur se fluturimi "ka përjetuar një incident gjatë udhëtimit" dhe se po dërgohet një aeroplan zëvendësues nga Dubai.
Policia saudite ishte e pranishme pranë aeroplanit pas uljes. Në hetime janë përfshirë kompania ajrore, si dhe autoritetet saudite dhe izraelite.
174 pasagjerë të sigurt, ndërhyrje e forcave ajrore izraelite
Siç është bërë e ditur më herët, 174 pasagjerë, përfshirë 27 fëmijë, shumica prej tyre izraelitë, janë të sigurt pasi aeroplani ka bërë ulje emergjente në Arabinë Saudite.
Boeing 737 MAX 8 po fluturonte në lartësinë 34.000 këmbë kur ka bërë një rënie të papritur prej 17.000 këmbësh mbi pjesën veriperëndimore të Arabisë Saudite, e shoqëruar me lëkundje në lartësi dhe ndryshime të shpejtësisë.
Transponderi ka emetuar fillimisht kodin 7700, që tregon rrezik të përgjithshëm, pastaj për një kohë të shkurtër kodin 7500, i cili sinjalizon rrëmbim ose ndërhyrje të paligjshme, para se të kthehej sërish në 7700 dhe të bënte ulje të sigurt në Tabuk.
Kodi 7500 ka shkaktuar reagim të menjëhershëm nga ushtria izraelite. Aeroplanë të Forcave Ajrore Izraelite (IAF) janë ngritur në ajër, ndërsa kryeministri Benjamin Netanyahu dhe ministri i mbrojtjes kanë zhvilluar konsultime urgjente. Situata më pas është sqaruar si incident i brendshëm në kabinën e pilotëve, jo si kërcënim sigurie ndaj vendit.
Linku i shkurtër: balkanvijesti.com/v/9DDYK7Em
