Rumania - Bosnjë e Hercegovinë nga ora 20:45: Skuadrat gati për ndeshjen në Bukuresht

Kombëtaret e Rumanisë dhe Bosnjë e Hercegovinës luajnë sonte ndeshjen e xhiros së dytë të Ligës së Kombeve në "Arena Nacionale" të Bukureshtit, me fillim në orën 20:45.

Sipas të dhënave nga vendi i ngjarjes, të dyja skuadrat kanë dalë tashmë në fushë për ngrohje, ndërsa kapiten i përfaqësueses së Bosnjë e Hercegovinës është Sead Kolashinac.

Rumania arrin në këtë takim nën presion, pasi humbi ndeshjen e parë të këtij edicioni ndaj Suedisë me rezultat 2:1. Ekipi i drejtuar nga Gheorghe Hagi nuk mori pjesë as në Kupën e Botës, pasi u eliminua në baraxh nga Turqia, ndërsa në tri ndeshjet miqësore të zhvilluara më pas ka pasur rezultate të ndryshme, humbje ndaj Sllovakisë, barazim me Gjeorgjinë dhe fitore kundër Uellsit.

Ndërkohë, Bosnjë e Hercegovina vjen në Bukuresht pas një pike të fituar në Poloni, duke vazhduar kështu serinë e paraqitjeve pozitive të kombëtares në periudhën e fundit, e kurorëzuar me kualifikimin në fazën e 1/16-ve të Kupës së Botës verën e kaluar. Për shkak të një dënimi ndaj federatës rumune, ndeshja e sotme do të luhet pa praninë e tifozëve në stadium.

Selekcioneri Sergej Barbarez, në konferencën para ndeshjes, ka folur për ndryshimet në stilin e lojës të Rumanisë me trajnerin e ri Gheorghe Hagi.

"Do të ishte e çuditshme që të mos ndryshojë diçka te rumunët, sepse çdo trajner ka stilin dhe vizionin e vet të lojës. I njohim lojtarët e tyre dhe kemi përvojë duke luajtur kundër tyre, e dimë si janë në klubet e tyre, por ajo që më intereson më shumë te rumunët është mentaliteti. Me këtë duhet të merremi mirë. Ata humbën ndeshjen e parë dhe tani janë nën presion si vendas. Do të përpiqemi ta shfrytëzojmë këtë. Më e rëndësishmja është të luajmë me guxim", ka deklaruar Barbarez.

Bilanci i takimeve dhe ekipet startuese

Rumania dhe Bosnjë e Hercegovina kanë luajtur deri më tani tetë ndeshje mes tyre, me një bilanc të barabartë prej katër fitoresh për secilën palë. Megjithatë, vlen të theksohet se vitin e kaluar dy skuadrat u përballën në kualifikueset për Kupën e Botës, dhe të dyja ndeshjet iu takuan kombëtares së Bosnjë e Hercegovinës.

Gjyqtar kryesor i takimit të sotëm është portugezi Luis Miguel Branco Godinho. Ndeshja transmetohet drejtpërdrejt edhe në kanalin BHT.

Rumania hyn në fushë me formacionin: Radu, Eissat, Ilie, Burca, Coubis, Stanciu, Screciu, Dragomir, Olaru, Mihaila dhe Birligea. Ndërsa Bosnjë e Hercegovina radhit: Zllomisliq, Kolashinac, Muharemoviq, Katiq, Memiq, Gigoviq, Mahmiq, Bashiq, Alajbegoviq, Tabakoviq dhe Bajraktareviq.