SHBA, Danimarka dhe Groenlanda nënshkruajnë marrëveshje pas muajsh tensionesh

Shtetet e Bashkuara, Danimarka dhe Groenlanda do të nënshkruajnë të martën një marrëveshje për territorin arktik, në margjinat e Asamblesë së Përgjithshme të OKB-së në Nju Jork. Lajmin e bëri të ditur të hënën në mbrëmje zyra e kryeministres daneze Mette Frederiksen.

Sipas burimeve zyrtare, marrëveshjen do ta nënshkruajnë kryeministri i Groenlandës, Jens Frederik Nielsen, kryeministrja e Danimarkës, Mette Frederiksen, dhe presidenti amerikan, Donald Trump.

Presidenti amerikan kishte shkaktuar një krizë të madhe me vendet evropiane pasi kishte kërcënuar me aneksimin e territorit autonom danez, për shkak të pozicionit të tij strategjik dhe burimeve natyrore që ai zotëron.

Marrëveshja, e cila u paralajmërua të premten nga Donald Trump, ende nuk është publikuar në tërësi, por sipas Kopenhagës, ajo "njeh" sovranitetin dhe integritetin territorial të Mbretërisë së Danimarkës, si dhe të drejtën e popullit groenlandez për vetëvendosje.

"Kjo është një marrëveshje e mirë nga pikëpamja daneze. Meqenëse është e dobishme për vendet nordike dhe për sigurinë në rajonin arktik, ajo është e dobishme edhe për Evropën dhe NATO-n", ka thënë kryeministrja e Danimarkës.

"Kjo është diçka për të cilën jemi pajtuar me amerikanët tashmë prej shumë, shumë kohësh: rajoni arktik dhe Atlantiku i Veriut përfaqësojnë një zonë të rëndësishme mbrojtëse për të gjitha vendet anëtare të NATO-s", ka theksuar Frederiksen.

Garanci për siguri, jo për sovranitet të cenuar

Sipas Uashingtonit, marrëveshja garanton se Rusia dhe Kina nuk do të mund të vendosin baza ushtarake në Groenlandë, as të bëjnë investime të mëdha në këtë territor arktik pa pëlqimin e autoriteteve në Nuuk.

Rasti i Groenlandës mbetet një nga çështjet më të ndjekura gjeopolitike të vitit, pasi kërcënimet e hershme të presidentit amerikan për aneksim krijuan shqetësim të thellë në radhët e aleatëve evropianë të NATO-s. Nënshkrimi i marrëveshjes në Nju Jork pritet të shënojë fundin formal të kësaj periudhe tensioni diplomatik mes Uashingtonit dhe Kopenhagës.