Mali i Zi mbylli të hënën në Luksemburg përkohësisht edhe dy kapituj negociues me Bashkimin Evropian, Kapitullin 2 për lirinë e lëvizjes së punëtorëve dhe Kapitullin 28 për mbrojtjen e konsumatorit dhe të shëndetit. Me këtë, vendi ka mbyllur 16 nga gjithsej 33 kapituj dhe ka kaluar gjysmën e procesit negociator.
Në konferencën ndërqeveritare Bashkimin Evropian e përfaqësuan zëvendësministrja qipriote për çështje evropiane, Marilena Raouna, në emër të kryesisë së Këshillit të BE-së, dhe komisionerja për zgjerim, Marta Kos. Delegacionin malazez e udhëhoqi kryeministri Milojko Spajiq, ndërsa në Luksemburg ishte edhe presidenti Jakov Milatoviq.
Spajiq deklaroi se deri në fund të vitit do të mbyllen të gjithë kapitujt dhe se Mali i Zi do të bëhet anëtarja e 28-të e BE-së në vitin 2028.
Komisionerja Kos theksoi se Brukseli tashmë po e përgatit vendin e Malit të Zi brenda Unionit dhe se po punohet në draftin e traktatit të anëtarësimit.
Sipas Radios Evropa e Lirë, Kos paralajmëroi se Komisioni Evropian javën e ardhshme do të prezantojë paketën financiare për Malin e Zi, me përshtatjen e buxhetit të BE-së për 28 anëtare.
Plani i Podgoricës është që negociatat të përfundojnë teknikisht deri në fund të vitit 2026, pas së cilës do të pasojë ratifikimi i traktatit të anëtarësimit në shtetet anëtare, me synimin që Mali i Zi të bëhet anëtar në vitin 2028.
Mali i Zi i hapi negociatat e anëtarësimit në vitin 2012 dhe aktualisht është kandidati më i avancuar nga Ballkani Perëndimor. Konferenca e radhës ndërqeveritare pritet në korrik.
Linku i shkurtër: balkanvijesti.com/v/eEn2XoI3
