Ligji për Dhomat e Specializuara te presidentja, BE: Ndryshimet janë të papranueshme

Kryetarja e Kuvendit të Kosovës, Albulena Haxhiu, ka nënshkruar më 15 tetor Ligjin nr. 11/L-001 për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar, i cili është dërguar te presidentja Justina Shiroka-Pula për shpallje. Këtë e ka konfirmuar për Telegrafi këshilltari për media i kryetares, Glauk Tahiri.

Ligji në fjalë ishte miratuar në seancën plenare të Kuvendit të Kosovës më 6 tetor 2026.

Këshilltari i presidentes, Bekim Kupina, ka njoftuar se Presidenca e ka pranuar ligjin dhe se presidentja Shiroka-Pula do të veprojë brenda afatit të parashikuar me ligj.

Po atë ditë kur ligji është dërguar për shpallje, komisionerja evropiane për Zgjerim, Marta Kos, ka vlerësuar se ndryshimet e fundit të ligjit për Dhomat e Specializuara janë të papranueshme.

Sipas saj, miratimi dhe zbatimi i këtyre ndryshimeve do të ishte në kundërshtim me obligimet që Kosova i ka marrë përsipër ndaj Bashkimit Evropian.

„Ndryshimet e fundit të Ligjit për Dhomat e Specializuara të Kosovës janë të papranueshme. Miratimi dhe zbatimi i tyre do të ishte në kundërshtim me obligimet e Kosovës ndaj BE-së. Ato do të përbënin një hap serioz prapa në rrugën e Kosovës drejt BE-së", ka shkruar Kos.

Komisionerja ka theksuar se respektimi i sundimit të ligjit dhe i institucioneve të pavarura gjyqësore është thelbësor për përgatitjen e hapave të ardhshëm në rrugën e Kosovës drejt integrimeve evropiane.

Bisedimi me negociatorin kryesor

Kos ka biseduar për rrugën evropiane të Kosovës me negociatorin kryesor, Jeton Zulfaj. Ajo ka vlerësuar se Kosova, pavarësisht paqëndrueshmërisë institucionale në dy vitet e fundit, ka bërë përparim në reformat që lidhen me sundimin e ligjit dhe Planin e Rritjes, si dhe ka ndërmarrë hapa të rëndësishëm drejt përfshirjes në Zonën e Pagesave në Euro (SEPA).

Dhomat e Specializuara, të cilat zhvillojnë seancat në Hagë, gjykojnë për krimet e luftës të kryera gjatë luftës në Kosovë.

Vendimi i presidentes Shiroka-Pula për shpalljen e ligjit të kontestuar pritet ende.